Tegernheimer Echo 2000, Nr. 2 - (26. Jg.)

Ja, dees geht ja af koa Kuahhaut! Do ham s' de Rindviecher jahrelang a "Tiermehl" ins Fuada und kaum oana hod se aufg'regt. Wenn s' "Kadaverpulver" g'sagt hätt'n' waar'n d' Leid glei hellhörig wor'n, aber ma muass bloß de richtig'n Kosenamen find'n, dann ko ma alles loswerd'n. Ja freili, dees kam bei de Mensch'n aa billiger, wenn ma de alte Oma, de grad g'storb'n is, wieda zu Babynahrung verarbeit'n daad!

"Hochwertiges Eiweiß", hoaßt 's da, aber in Wirklichkeit is dees bloß hochgradig kriminell! A Bauer, der ned woaß, wos so a Rindviech normalerweis frisst, der sollt' liaba af Kunstmaler umschul'n. "Ja, de andern ham's aa g'macht" - mid dem Spruch ko ma alles rechtfertigen. Es gibt überall a paar, de eahna eigene Muatta vakaffa daadn - "d Hauptsach', 's bringt a Geld".

Schuld san freili aa de meist'n sogenannt'n "Verbraucher": Alle fünf Jahr' a deias Auto, aba dafür alle Tag' a billig's Fleisch. Wo de Superpreise herkumma, hod koana wiss'n woll'n. Wos ham s' af de Leid g'schimpft, de immer wieda vor dem Rinderwahn g'warnt ham! Wer d' Wahrheit sagt, der wird sowieso z'erst amol ausg'lacht und für blöd hi'g'stellt - bis se dann zoagt, daas er Recht hod. Dees wird aa im neia Jahr ned anders wer'n. Drum: Lacha S' oft, aber ned an da falsch'n Stell!

I laaß ma mein' Weihnachtsbrat'n vo Madagaskar schicka. Do woaß I zwar ned, wos für a Viech daas I aaf 'n Tisch kriag, aber a BSE is do ned drin! Guat'n Appetit und a recht a guad's neis Jahr!